八大大學丨包括邊幾間

最後更新日期 : 2023年2月23日

所謂「八大」，一般而言指8間獲政府教資會資助嘅大專院校。喺2016年香港教育學院升格為香港教育大學前，所謂 「八大」其實都包括並非「大學」嘅香港教育學院。喺升格後，八大就名正言順包括8間大學。

以2023年QS世界大學排名為例，佢哋嘅次序係

• 香港大學：全球第21位
• 香港中文大學：全球第38位
• 香港科技大學：全球第40位
• 香港城巿大學：全球第54位
• 香港理工大學：全球第65位
• 香港浸會大學：全球第281位
• 嶺南大學：全球第601-650位
  
  
• 香港教育大學 - 未入全球排名榜
  

雖然香港教育大學未有入排行榜，但如果只係睇「Education 教育」呢個科目，佢哋喺全球排行第17位。

• 大學之間嘅分別

其實八大及自資大學（例如香港公開大學、香港恒生大學、香港樹仁大學）一定會有分別，教資會資助嘅大學收生水平較高，亦獲政府資助，學系往往會進行唔同嘅研究。相反，自資大學只能收取成績較差而未能入讀港大、中大、科大、理大、城大等八大嘅學生，而且財政上往往只係依賴學生嘅學費，未有政府資助，亦都較少開展研究。當八大往往需要最佳5科成績（Best 5）達近20分先可以入讀，唔少自資大學收分非常低。例如香港公開大學2020年嘅聯招收分，普通商科低見15，Digital Business更加低見12。

雖然大家都係「大學」，但自資大學與八大喺各方面依然有一段很遙遠嘅距離。雖然讀完後都係一個「學位」，但呢個「學位」嘅背後價值絕對有好大嘅分別。

• 八大是否包括自資大學？

所有自資大學（例如香港公開大學、香港恒生大學、香港樹仁大學）都不屬於一般所指嘅八大，整體水平亦較八大有一段距離。